Fátækt stórs hluta landsmanna til umfjöllunar í Kveik
Þrátt fyrir að ég telji mig vita ýmislegt um fátækt á Íslandi, enda reyni ég að lesa allar umfjallanir og viðtöl (Stundin hefur mikið fjallað um fátækt), hef hlustað á hlaðvarpsþætti um fátækt (sem því miður eru ekki lengur aðgengilegir) fannst mér nánast óbærilegt að horfa á Kveiksþáttinn í kvöld. Það verður allt svo mikið raunverulegra og átakanlegra þegar fólk talar í mynd. Að sjá fólkið, aðstæður þess, heyra um ævi þess og vonleysi, og fá svo að vita fjöldann, að það eru ekki bara þessar manneskjur heldur tugþúsundir í svipuðum sporum, það er þyngra en tárum taki.
Á bilinu 18-35 þúsund búa við fátækt hverju sinni, eða 5-10 prósent landsmanna. Af þeim eru sjö til tíu þúsund í mikilli neyð og búa við sárafátækt.Ég tek undir með Óskari Steini varaforseta ungra jafnaðarmanna sem sagði eftir þáttinn:
Samkvæmt tölum Hagstofunnar eru 28-35 þúsund manns undir lágtekjumörkum, og eru þar með fátæk, þar af allt að 10 þúsund börn undir 16 ára aldri.
Það er ógeðslegt að þúsundir Íslendinga búi í fátækt meðan sumir eiga milljarða. Það er ekkert sem réttlætir þetta og það er hægt að breyta þessu. BTW, með tilvonandi hækkun skólagjalda í háskóla er enn frekar verið að hefta tækifæri fátækra til að komast upp úr fátæktinni.
Efnisorð: fátækt, Innflytjendamál, kapítalismi, málefni aldraðra, málefni fatlaðra, menntamál, Sjónvarpsþættir, Verkalýður
<< Home